UV-C QHANSUYATAMPI CH’UQI YAPUCHAÑA (Dictado 15/03/16)

1

Qullasuyu markasanxa ch’uqixa wali wakiskiri juyrawa, kunatixa sapüruwa manq’ataraki, ukampisa aksa suni thaya pata tuqinxa nayriri juk’ampi yapuchatawa, ukampisa yapunakanxa jani walt’äwinakaxa utjapuniwa, sañani jani walt’ayiri laq’unaka, kunatixa sapa maratjamawa juk’ampi aka jani walt’äwinakaxa pacha mayjt’äwi tuqinakata utjantaskaraki, uraqi tukusïwita, uraqinakana wañantäwipata, uma sayantäwita ukhamaraki junt’u pachanakampi thaya pachanakampi mäki mayjt’äwipata; ukatwa juk’ampi kust’ata achu kastanaka munataraki, ukhamata aka achunakaxa thaya, junt’u pachanakana mayjt’äwinakana jakantapxañapataki.

Utjiri ch’uqinakana kasta kastanakarjama jaljt’atapaxa janiwa sinti wakiskïrinakapxkiti, kunatixa kastanakaru majyt’ata ch’uqinakaxa walja kastanakwa jikxatawayapxatäna.

Biotecnologia uka thakhi tuqixa manq’a jani wiñaya tukusiñapataki amta tuqiru ukhamaraki alinakana juk’ampi ch’amanchirinaka jikxatäwina aski apthapïwinakawa jikxatatarakispa. Jichha yatxatäwinakanxa mejoramiento genético  ukaxa juk’ampi chiqa kust’ata thakhinaka yatxataña munasiraki, kunatixa fenotipos munatanaka yapunakana chhijlläwi tuqi jikxatañataki.

Yatxatirinakaxa sapxiwa, mejoramiento genético ali kastanakanxa juk’ata juk’aruwa jani ch’ama jiwt’ayasisa jikxatata, kunatixa aka machaqa kastanaka jikxatäwixa aski chhijlläwita jikxatasirakispa. Aka munasita carácteres ukanakaxa genes tuqi

Qhispillu taypina yapuchata thakhixa walja mayjt’ata ali kastanaka jikxatayïriwa, ukhamata yapuchäwinakaxa jaqitaki wakiskiripa jikxatataspa, ukampisa tunka ukhamaraki pä tunka jilawa juk’ampi ali mayjt’äwinaka jikxatatarakispa, variación somaclonal espontánea uka thakhita sipanxa mutagénesis ukaxa kastatjamawa mayjt’arakispa.

2

Inducción de mutaciones ukaxa alinakana  mejoramiento genético jikxataña thakhiwa, ukhamata walja juk’ampi mayjt’ata kastanaka jikxatañataki.

Novak ukhamaraki Brunner (1992), jupanakatakixa mutaciones inducidas ali kastanakatakixa thakhi saranakawa kimsaqallqu tunka jila maranaka apnaqatäxaraki, kunatixa qhanayäwimpiwa (radiación) composición genética juk’ampi kasta utjañapataki apnaqataraki, jani alina genoma mayjt’ayasa ukhamata achuntäwipa juk’ampi yapt’añataki.

Agencia Internacional de Energía Atómica (IAEA) jupanakaxa Organización de Naciones Unidas para la Alimentación y la Agricultura (FAO) jupanakampi chikt’ata walja jakhu jikxatäwinaka apthapiwayapxatäna, kunatixa niya kimsa waranqa jila mutaciones jikxatatärakina. Kenia markanxa aka thakhi tuqixa mä kasta trigo jikxatasiwayi kunatixa aka trigo achuxa waña uraqina jakirirakiwa, Vietnam uksanxa kust’ata yatxatïrinakaxa walja arroz kastanaka jayu uraqinakana jakirinaka Mekong ukjana jikxatawayapxatäna.

Chávez (1991) jupa yatxatïrixa siwa, walja yapunakawa inducción de mutación tuqixa aski achüwinaka aksa Perú markana jikxatawayapxatäna, kunatixa siwara mutantes alayaru jisk’a jiläwini jikxatawayapxatäna, juk’ampi yaranani ukhamaraki q’ala yarananaka jikxatawayapxatäna.

Aguilar (2013) siwa, radiación UV-C ukaxa agente mutagénico ukhama apnaqataspa sasawa iwxt’araki, kasta kasta alinakana ukhamaraki in vitro yapuna walja kastanakana, ukhamata mutantes alinaka jikxatañataki, aka alinakasti maya maya factores suykatirinakaniwa.

(Extracto de Tesis de Grado, Delia Mamani C., Carrera Ingeniería Agronómica, UNIBOL-A-“TK”)

MANQ’ASIÑANAKASXATA (dictado 08/03/16)

1

Manq’aña tuqita sumpacha amuyt’añaxa, aka pusi tunka qhipa maranakanxa juk’ata juk’ata nayraqataruwa qhanstaski. Jichha pachanakanxa “manq’aña tuqita phuqht’atanïñaxa taqi jaqinïtatjamawa, sapa kutinjama jaqi tuqitsa, qullqi tuqitsa manq’aña tuqiru phuqhatanïñataki mantasa, janchiru ch’amanchirinaka jaqina  sapüru ch’amapana munataparjama phuqht’asa ukata munatarjama manq’añanaka mä suma p’ikhu k’umara jakaña utjayañatakiwa amuyata” (FAO, 2010).

Bolivia markana yapu yapuchaña uywa uywachañaxa nayra pachanakatpachwa juti, alaya tuqi ch’umi phuthuti, junt’u uraqinakanwa nayraqataru sarantayatatayna; ukhamaraki kawkjanti qhirwa qullu irama uraqinakana ukasti jilpachaxa aka marka taypiwjana jikxatasipxaraki; ukxarusti suni thaya patana inti jalanta tuqiru ukhamaraki aynacha uraqinakansa yapuchañampi uywachañampiwa sartatarakitayna.

Irnaqañanakaxa pachpa uraqinpacha sarnaqataparjamawa jichunuqtataraki, uraqinakaxa yuntampi yapuchatakiwa, mecanización ukampixa juk’akiwa. Juyra apthapiñanxa lijwana, azadón ukata jusi yänakampikiwa irnaqata.

Ch’uxña achunaka ukhamaraki ch’uxña alinakaxa verduras ukhama sutinipxarakiwa, jaqinakana manq’apxañapatakirakiwa. Apnaqasitapaxa chikata jani ukaxa taqpachawa, alinakana janchipawjanakatjamarakiwa; saphi, laphi, tunu, achu jani ukaxa chira.

2

Bolivia markanxa walja kasta ch’uxña achunakawa utji, kunaynama uraqiwjanakaru, laq’anakaruwa jichuntapxi, ukjamaraki sapa markana jakäwiparjama munataparjama jikxatasisa.

Aka Jach’a Yatiqaña Utasana ch’uxña achunakana wali askinaka uñacht’ayatapaxa, yatiqirinakana manq’añapataki ukhamaraki k’umaräpxañapatakiwa, kunjamatixa niya walja vitaminas, proteínas, calcio, sales minerales, aceites, ácidos orgánicos ukata juk’ampi ch’amanchirinakwa churapxistu, ukhamata janchisa tuqinakana usuntañanakata juk’aqayañaruwa yanapt’apxistu. Aka manq’anakaxa q’allutanakana ancha wakiskiriwa, ukhamaraki chiküru q’althi manq’a manq’añanakampina aruma manq’añanakampina ukata ch’uxña achunakaxa yaqha akatjamata suma manq’aña wakt’ayatanakansa chikancht’asipuniwa; manq’aña tuqina jasaki manq’asitapata ukhamaraki manq’anakarusa muxsancht’atapata askinjamawa yanapt’i.

Yatiqirinakana manq’añanakaparu yanapt’añatakixa jilpacha kasta kasta ch’uxña achunaka uñt’añaxa ancha wakiskiriwa. Yatiqirinakana manq’aña utapa tuqinsa utapanakansa ukata yaqha tuqinakansa ch’uxña achunaka manq’añxata yatiñaxa janiwa utjkiti, kunjamatixa taqi akanakaxa pachpa aski manq’añanakapanwa uñjasiraki, ukhamatwa yatiqäwi taypina uka pachparaki kuna luräwinaka taypinsa aynacht’añanakana jikxatasipxaraki.

(Extracto Tesina de Grado T.S. Rocio Rada, Carrera Ingeniería Agronómica, UNIBOL-A-“TK”)

PACHA UÑAÑCHAYIRINAKA

1

Aksa thaya pata uraqinxa pacha tuqita kunaymana jani walt’ayirinakawa utji, sañani yapuchaña tuqina, ukatjamawa aka achunakaxa jani walt’äwina jikxatasipxi. Janiwa aksa tuqina mä suma amta wakichäwi pachata yatiñataki utjkiti, ukhamata patankiri yapuchirinakana yapuchäwinakapata yatipxañapataki. Mä pachata uñjiri  jach’a uta utt’ayañaxa walja qullqitakiwa, ukatwa estación meteorológica sata utaxa jani ancha utjkiti.

Khaysa Provincia Los Andes ayllunkirinakaxa, achachilata allchhinakaruwa  yatiñanaka yatichañxa sarantayasipki, pacha uñañchayirinakata uñjasa ullarasa ukhamaraki uñch’ukisina. Jani walt’äwinaka utjaspa  ukjaxa suma pacha tuqita uñjasina yatiñaxa wakisispa, ukhamwa FAO (2014) uksankirinakaxa qhananchapxi.

Pachata yatiñaxa nayra pachatwa mä apnaqäwjama juti. Ukata aymara ayllunakana aka yatïwi  uñjasina apnaqasiski, ukaxa kunsa saña muni, kunaymani pachanakana pampa alinaka, pampa uywanaka, phaxsinaka, jallüwinaka uñch’ukipxirïna, ukhamatwa yapuchirinakaxa pachaparu  apnaqaña amuyt’apxäna, ukatwa yatiñanakaparjama yapuchapxi. Ukhamarakiwa juyphi, chhijchhi ukanakatxa tuwaqasipxi.

Pacha uñañchayirinakaxa wali askiwa, pachaxa kunjamänisa uka uñañchayañataki, ukata  pacha uñañchayirinakaxa uka maraxa kunjänisa jalluniti phajsanicha uka uñjañatakisa wali askirakiwa, ukata kunjama maränisa jisxañataki. Yapuchiri jilatanakatakixa mä pacha tupjamawa.

 2

Khaysa ayllunakanxa janiwa pacha uñañchayirinaka uñacht’ayki ukhama pacharjama lurapxkiti, uksanakanxa kunawsanakasa qhullipxakiwa ukhamarakiwa yapuchapxakiwa, ukanakatjamawa yapunakata juk’a achunakaki apthapisxapxi.

Juk’ata juk’ata pacha uñañchayirinakana yatiñanakapxa armasisipkiwa, ukhamaraki chhaqtayasipkiwa, kunatixa awki taykanakawa yatiñanakanipxi, ukata jila maranixapxatapatwa chhaqtaskaraki. Uka yatiñanakapaxa janiwa jutïri wawanakaruxa yatiyatäxiti, kunatixa aka yatiñanakaxa janiwa qillqantatapxkiti.

Pachanakana saräwinakapatxa jani walt’äwinakawa utji, kunatixa janiwa pacha uñañchayirinakata suma yatiñaxa utjkiti. Ukatwa khaysa jisk’a ayllunakana uñjañaxa  wali askixa.

Khaysa ayllunakanxa pacha uñañchayirinakata yatiñanakaxa juk’ata juk’ata armasisipkiwa, kunatixa janiwa jilïri achachilanakata mä yatiyawi qhipawirinakaru utjkiti, ukata janiwa suma phuqhata yatiña tuqita yatxapxkiti. Ukatwa apthapiñaxa wali wakisi, sañani kawkiri panqara alinakasa, uywanakasa, juk’ampi pacha uñañchayirinakasa askirjama uñjaña, ukhamata jani chhaqtañapataki, jila kullakanakana yanapt’anakapampi apthapisina qillqantaña.

 3

Mä aylluna pacha uñañchayirinakata uñt’añaxa wali askiwa, jani ukhamaspa ukaxa utjirinakaruwa jani walt’aykaspati, sapa uñañchäwiwa mä yatiyawjama taqina askipataki uñt’ayistu.

Aka sawilla yatxatäwixa pacha uñañchayirinaka qillqatampi apthapiña amtaniwa, ukampirusa yapumpi sarnaqiri awki taykanakaxa aka yatiñanaka wali suma imasipki, ukatwa apthapiñaxa wali askixa.

Pacha uñañchayirinakaxa pacha tuqita  amuyt’ayistu, kunjamanisa uka yatiyasina irptiristu, ukhamata achuyäwinaka uñjañataki, sumaniti jani ukaxa janicha sumäkani.

Ali uñañchayirinakaxa pampa alinakawa, ukhamaraki achuyata alinakarakiwa, jiläwi pachapanwa uñjaña, sañani, sank’ayu ukhamaraki juk’ampi alinakana panqaranakapaxa kawkiri satasa askispa uka uñjañaruwa yanapt’i, nayraqata sata, taypi sata, qhipa satacha askipa uka amuyañaruwa yanapt’i.

Uywa uñañchayirinakaxa, jilpachaxa pampa uywanakawa ukhamaraki chhiqani uywanakarakiwa, sarnaqäwinakapawa unch’ukiña, ukatwa kunawsa yapuchañsa yatxaña, aka uywanakana luräwinakaparjama. Ukampirusa uywanakana sarnaqäwipaxa juyrana apthapiwipaxa sumaniti jani ukaxa janicha sumäkani ukwa uñañchayi. Ukhamarakiwa mara tuqitxa uñañchayi, jallu maraniti jani ukaxa waña maranicha. Ukampirusa chhijchhi ukatxa juyphi ukanakana utjatanakapsa yatiyarakiwa.

(Extracto Tesina de Grado T.S. Rosa Cadena, Carrera Ingeniería Agronómica, UNIBOL-A-“TK”)

AMUYUNAKA SARANAKASARU KUTIKIPJTAYAÑA

K'awna utjayañataki (dictado 1)

Wallpa k’awnaxa kunaymana ch’amanchirinakaniwa, kunatixa wila masinakana manq’äwipana wali wakiskiriwa, k’awnana chanipaxa alañataki juk’akiwa,  aychaxa jila  qullqimpiwa alataspa, ukatwa k’awniri wallpa uywasiñaxa wakisispa.

Jichha pachanxa walja kasta k’awniri wallpanakawa utji. Jichha pachana taqi tuqina uywañawa wakisi, akanakaxa walja k’awnirinakawa, ukatwa uywasirakispa.

K’awniri wallpanakaxa, nayraqata k’awnäwipana suma jathini k’awnanakawa utjaspa. Akanxa wallpanaka mä jathiniki ukhamaraki jani lik’ini wallpa uywañawa wakisi, ukatjamawa k’awniri wallpa uywañatakixa suma uñnaqaniñapa.

Aka amta lurt’añatakixa, taqi yänaka suma mistuñapatakixa amtanaka phuqhañanakawa utji, akasti wila masinakaru ch’amanchäwipana yanapt’añataki.

Aka ayllunxa, k’awniri wallpa uywäwixa nayra maranakatpachawa uywasïna, kunatixa qamäwinakapana wila masinakampi manq’asiñataki, k’awniri wallpa uywäwixa akatjamawa chhaqtawayi. K’awniri wallpanakaxa taqi tuqinakansa jakasipxakiwa.

Wallpa uywäwixa nayra maranakana janiwa suma uñt’apxkänti, nayrata jichha pacharusti wallpa uywäwixa aka markasana jilxatxiwa, kunatixa chani tuqita jalaqtaxa taqpacha markanakana uñjasxi.   

Aka junt’u markanxa k’awniri wallpa uywañataki pacha saräwipaxa wali askiwa, ukhamaraki amta wakt’ayañanakaxa lurasxañapawa, taqpacha utjiri qhatunakaru apañataki.

(Extracto de Proyecto de Emprendimiento Productivo)